SILANG RESIDENTS, HUMIHINGI NG AKSYON SA DILG
SILANG, CAVITE — Nilinaw ng Korte Suprema na ang Bise Gobernador o Bise Mayor, depende sa lokal na posisyong nabakante, ang dapat humalili sa nabakanteng puwesto ng gobernador o alkalde—at hindi ang kandidatong pumangalawa sa halalan.
Ito ay matapos pinal na tanggihan ng Supreme Court En Banc ang motion for reconsideration na inihain ni Datu Pax Ali S. Mangudadatu sa G.R. Nos. 260219 at 260231 noong Agosto 26, 2026.
Pinagtibay ng Korte ang nauna nitong desisyon na nagpapanatili sa pagkansela ng Certificate of Candidacy (COC) ni Mangudadatu para sa pagka-Gobernador ng Sultan Kudarat.
Kasabay nito, tuluyan nang tinalikuran ng Korte Suprema ang tinatawag na “second placer rule,” kung saan maaaring ideklarang panalo ang kandidatong nakakuha ng ikalawang pinakamataas na boto kapag ang nangungunang kandidato ay nadiskuwalipika o napatunayang hindi kwalipikadong manungkulan.
Ayon sa Korte, walang batas na nagbibigay ng kapangyarihan para gamitin ang “second placer rule.” Sa halip, kinikilala ng Konstitusyon bilang nahalal ang kandidatong nakakuha ng pinakamataas na bilang ng boto.
Kapag nagkaroon ng permanenteng bakante dahil ang nanalong kandidato ay napatunayang hindi kwalipikadong manungkulan, dapat punan ang bakante alinsunod sa mga probisyon sa succession o paghalili sa ilalim ng Local Government Code.
Dahil dito, ang Bise Gobernador ang hahalili sa posisyon ng Gobernador para sa natitirang bahagi ng termino, sa halip na ideklarang panalo ang kandidatong pumangalawa.
Nilinaw naman ng Korte Suprema na limitado ang naturang ruling sa mga lokal na halal na posisyon na saklaw ng Local Government Code. Hindi nito tinukoy kung naaangkop ang “second placer rule” o katulad na mga panuntunan sa succession sa mga pambansang halal na posisyon.
SILANG RESIDENTS, HUMIHINGI NG AKSYON SA DILG
Samantala, kaugnay ng usapin sa paghalili sa pagka-alkalde sa Silang, Cavite, nananawagan ang mga residente ng nararapat na aksyon at paglilinaw mula sa Department of the Interior and Local Government (DILG) na pinamumunuan ni Secretary Jonvic Remulla hinggil sa wastong pagpapatupad ng mga probisyon sa succession.
Hinihiling ng mga residente sa DILG na makatulong sa pagbibigay ng malinaw at naaayon sa batas na resolusyon sa usapin ng pamumuno sa bayan, alinsunod sa desisyon ng Korte Suprema at sa mga probisyon ng Local Government Code.
Ayon sa mga residente, nararapat na gabayan ng umiiral na batas at mga opisyal na legal na opinyon ang anumang hakbang ng mga kinauukulang ahensya upang matiyak ang pagpapatuloy ng maayos na pamamahala at maiwasan ang karagdagang kalituhan sa hanay ng mga mamamayan ng Silang.
Panawagan ng mga residente sa mga kinauukulang awtoridad, kabilang ang DILG, na tugunan ang usapin sa pamamagitan ng nararapat na legal at administratibong proseso at mabigyan ang mga taga-Silang ng malinaw na paliwanag kung sino ang naaayon sa batas na dapat humalili sa posisyon ng alkalde.
0 Comments