LAGUNA — Higit 2000 residente mula sa iba’t ibang bayan at barangay ng Laguna ang nakinabang sa isang malawakang Grand Medical Mission na ginanap sa Laguna Sports Complex. Ang naturang aktibidad ay naging posible sa tulong ng Akay ni Sol Partylist, katuwang ang Pamahalaang Panlalawigan ng Laguna at ilang samahang sibiko at boluntaryo.
Nagbigay ng oras at serbisyo ang iba’t ibang grupo gaya ng Kadiwa Eagles Club, Life Saver Medical Services, LE CARE Worldwide Foundation, 2World Service Caravan Effata, Alpha Phi Omega, Knights Region NCR XVIII, Philippine Eagle Shepherd Region, Kingsmen, Malayang Agila Sacred Grand Medical Mission Beta Alpha, APO ni Rizal Alumni Association-Calamba, at iba pang volunteer doctors, nurses, at medical professionals.
Ipinamahagi sa mga mamamayan ang libreng konsultasyong medikal at dental, gamot, therapy sessions, X-ray, ECG, at iba pang pangunahing serbisyong pangkalusugan—lalo na para sa mga pamilyang hirap makakuha ng regular na atensyong medikal.
Ayon kay G. Doland Castro, Secretary General ng Akay ni Sol Partylist, ang proyekto ay bahagi ng kanilang tuloy-tuloy na adbokasiya para sa mas mahusay na kalusugan sa lalawigan. Binigyang-diin niya na nakahanay ito sa layunin ni Gov. Sol Aragones na “GOByernong may SOLusyon” na naglalayong magbigay ng abot-kamay at de-kalidad na serbisyong medikal para sa bawat Lagunense.
Ibinahagi rin ni Mayor Aurelio, kinatawan ng Akay ni Sol Partylist, na ang kanilang grupo ay nananatiling handang gumabay at sumuporta sa mga kababayan. “Magpapatuloy kaming maghatid ng mga programang tunay na nakakatulong at tumutugon sa pangangailangan ng ating mamamayan,” aniya.
Lubos namang ikinagalak ng mga residente ang inisyatiba, dahil bukod sa agarang lunas sa kanilang karamdaman, nagbigay rin ito ng bagong pag-asa at kumpiyansa na may mga organisasyong handang magmalasakit para sa kanilang kapakanan.
Sa kabuuan, ipinakita ng Grand Medical Mission ang lakas ng pagkakaisa ng pamahalaan, pribadong sektor, at mga boluntaryong grupo—patunay na kapag nagtagpo ang malasakit at bayanihan, mas nagiging malusog at mas matatag ang komunidad.
0 Comments